Zrpana22

آذانونه به پکار وي ( نجيب عامر )

23.10.2008 10:27

د نجيب عامر غزل

که بدلون راوستل غواړئ څو سرونه به پکار وي
دوخت ستر ګو کې کتو ته نظرونه به پکار وي
دا غمى اولس دې ولې د غفلت په خوب ويده وي
لږ منبر ته ورتلل غواړي آذانونه به پکار وي
څو د غره او د ښار منځ کې نفرتونه ترۍ تم شي
راشه درشه به پکاروي تماسونه به پکار وي
دا مرغۍ له قفسونو نه بهر راويستل غواړي
دښار پيغلو ته په ښار کې ګودرونه به پکار وي
چې زهنونه مو ټکور کړي چې جنګونه رانه هير کړي
د مارغانو د چرچڼو اوازونه به پکار وي
داهم هغه دهشت ګرددى چې تخريب د مينې غواړي
درقيب په سر د کاڼو ګوذارونه به پکار وي
نجيب خانه ! منزل داسې په آسانه موندى نه شي
دسرکو شونډو تکل کې سره جامونه به پکاروي

                                         24  اکتوبر 2008 
                                       پېښور